როგორც ჩვენთვის გახდა ცნობილი, ამ დროისთვის მოროშკინა დიღმის პოლიციის განყოფილებაში იმყოფება.
სავარაუდოდ, დღესვე მოროშკინასთვის აღმკვეთის ღონისძიების შეფარდების საკითხთან დაკავშირებით სასამართლო პროცესი გაიმართება.
შეგახსენებთ, რომ მოროშკინამ "ნანუკას შოუს" საახალწლო გადაცემის ჩაწერაზე გაზეთ "პრაიმ ტაიმის" რედაქტორი თაკო ფხაკაძე სცემა.
როგორც მოროშკინამ ტელეკომპანია "კავკასიის" პირდაპირ ეთერში განაცხადა, ტელეკომპანია "იმედის" გადაცემა "ნანუკას შოუდან" მიწვევა სამი დღის წინ მიიღო.
"არ მგონია, რომ კოდუების დაფინანსებულ გადაცემაში იყოს ჩემი ადგილი, თუმცა მიწვევა მივიღე, როგორც ჟურნალისტს, დამაინტერესა. როცა ჩაწერაზე მივედი, "პრაიმ ტაიმის" ხალიჩა დავინახე და მივხვდი, რომ "ნანუკა ჟორჟოლიანის შოუს" დახმარებით ფხაკაძე პროვოკაციას მიწყობდა", - აღნიშნა მოროშკინამ.
მისივე თქმით, საახალწლო გადაცემის ჩაწერაზე მიწვეული სტუმრები სხვადასხვა ნომინაციის მიხედვით ჯილდოვდებოდნენ, "გადაცემა სავსე იყო პოზიტივით", თავად მოროშკინა კი ნომინაციაში "ყველაზე უგემოვნებოები" დაასახელეს.
"როცა მივდიოდი ჯილდოს ასაღებად, თაკო ფხაკაძემ დამცინავად ჩაიცინა. თუმცა, ავიღე ეს ჯილდო. ყველას ლამაზ თოჯინებს ურიგებდნენ, მე კი - შავი, სათვალინია თოჯინა მომცეს. ესეც ავიტანე და ნანუკას ვთხოვე, რომ სიტყვის უფლება მოეცა. ვთქვი, რომ ალბათ თაკო ფხაკაძე ვერ შედგა, როგორც ჟურნალისტი, როგორც ქალი, როგორც პიროვნება და შურს ყველა ქალის, რომელიც თავისით იკვალავს გზას და არა გიგი უგულავას დახმარებით. მომიტივეთ, სხვა გზა არ მქონდა, როცა დავბრუნდი ჩემს ადგილზე და ყურში ჩამესმა თაკოს ქირქილი. მაპატიოს საზოგადოებამ, ეხლავე მივმართავ საზოგადოებას და სამართალდამცველ ორგანოებს - მე ვცემე თაკო ფხაკაძე", - განაცხადა მოროშკინამ და დასძინა, რომ დავა სავარაუდოდ, სასამართლოში გაგრძელდება.
სამართალდამცველებმა ჟურნალისტი ლალი მოროშკინა დააკავეს.
0
